Na Galipedia, a wikipedia en galego.

Esta parroquia do Concello de Arzúa conta cunha poboación, segundo o censo do 2006, de 2.541 habitantes, dos que 1227 son homes e 1314 son mulleres. Segundo o Nomenclátor Oficial da Xunta de Galicia suman un total de 5 os lugares de Arzúa (Santiago).

As feiras quincenais do Queixo de Arzúa celébranse nesta parroquia os días 8 e 22 de cada mes no Campo da feira arzuán. A feira do día 8 celébrase desde hai dez séculos, e a do día 22 ten lugar desde o século XVIII. Tamén teñen sona a feira do cabalo, a feira do capón e a feira dos cans de caza.

Por ser a parroquia que acolle a capitalidade municipal tamén se celebran aqui a Festa do Queixo, a Festa dos Botes, a Mostra de Artesanía Popular no Camiño e a Mostra Galega de Apicultura, entre outras.

Nos xardíns e parques desta parroquia pode verse o monumento ás queixeiras, o monumento ao emigrante, o monumento ao historiador Padre Pardo, o monumento ao peregrino e a escultura homenaxe a Ramón Pazos Seaje.

Algúns dos lugares máis interesantes para visitar en Santiago de Arzúa son a Fonte do Francés, a Capela da Madanela, a Capela das Barrosas, coa súa fermosa carballeira, a igrexa de Santiago de Arzúa, ou o lavadoiro de Río Vello.

O casco vello do centro da vila está pragado de interesantes edificios e, por ser esta a capital do termo, acolle a Casa do Concello, a Casa da Cultura, o Centro Médico de Arzúa, o Xulgado de Arzúa, etc...